விசித்திர நீதி மன்றங்கள்

ஹெல்மெட் இல்லாமல் பிடிபட்டவர்கள் 1.40 லட்சம் பேர் என சென்னை ஐகோர்ட்டில் தமிழக அரசு தகவல் அளித்துள்ளதாகவும், முழு அளவில் அமலாகாததால் நீதிபதி கடும் வேதனை என்றும் இன்றைய தினமலர் நாளிதழில் செய்தி வந்துள்ளது. அதே போன்று, ஹெல்மெட் அணிந்து எத்தனை  வழிப்பறி கொள்ளை நடந்தது என்றும் அரசு தெரிவித்தால் நன்றாக இருக்கும்.  ஹெல்மெட் கட்டாயமாக அணிய வேண்டும் என்ற நீதிமன்ற உத்திரவினை எதிர்த்து தொடரப்பட்ட வழக்கில்,  ஹெல்மெட் அணிவதில் எந்தவித சமரசத்திற்கும் இடமில்லை என்றும் நீதியரசர் கூறியிருப்பதாக  செய்தி வெளியாகியுள்ளது.

ஹெல்மெட் அணிந்து தான் இரு சக்கர வாகனம் ஓட்ட வேண்டுமென்பதை குறை சொல்லவில்லை. எத்தனையோ வழக்குகள் நிலுவையில் இருக்கையில், இந்த புள்ளி விவர கணக்கில் கவனம் செலுத்துவதன் காரணம் தான் புரியவில்லை.  

விபத்து என்பது எதிர்பாராமல் நடக்கும் அசம்பாவிதம். யாரும், வேண்டி வலிய சென்று விபத்தினை எதிர்கொள்வதில்லை. ஹெல்மெட் அணிவதால் விபத்துக்கள் முற்றிலும் தவிர்க்கப்படுவதில்லை. ஓரு நாளில் எத்தனை விபத்துக்கள் நடக்கின்றன ? அந்த விபத்துகளில் எத்தனை இரு சக்கர வாகன் விபத்துக்கள் ? அந்த இரு சக்கர வாகன் விபத்துகளில் எத்தனி நபர்கள் ஹெல்மெட் அணியாததால் பாதிக்கப்படுகின்றார்கள் ? இந்த புள்ளி விவரங்களை சேகரித்தால், நீதியரசர் குமாரசாமியின் கணக்குப்படி ஹெல்மெட் அணிய கட்டாயப்படுத்த வேண்டிய அவசியமே இருக்காது. கட்டாய ஹெல்மெட் உத்திரவினால் பயனடைவோர் ஹெல்மெட் தயாரிப்பாளர்கள், மற்றும் விற்பனையாளர்கள், காவல் துறையினர், இரு சக்கர வாகன பாதுகாவலர்கள் (ஹெல்மெட் பாதுகாக்க தனியாக கட்டணம்). சென்னை உயர் நீதிமன்றம் எதிரிலேயே, தமிழக அமைச்சர் ஒருவரின் மகன், வேகமாக சென்றதில், வேகத்தடை இருப்பதை அறியாமல் தவறி விழுந்து மரணமடைந்ததாக செய்தி. வேகமாக சென்றதும், ஹெல்மெட் அணியாமல் சென்றதும் அவரின் குற்றமேயாக இருந்தாலும், வேகத்தடை இருப்பதனை அடையாளம் காட்டும் பிரதிபலிப்பான்களை (Reflector) அமைக்காதது யார் குற்றம் ? தரமற்ற சாலைகளும், குண்டும் குழியுமான சாலைகளுக்கும் யார் காரணம் ?

சில வருடங்களுக்கு முன்பு, கொலை, கற்பழிப்பு போன்ற குற்றங்கள் கறுப்பு கண்ணாடி ஏற்றப்பட்ட வாகனங்களில் நடைபெறுகின்றது ஆகவே, வாகனங்களில், கறுப்புக்கண்ணாடி ஏற்றக்கூடாது என்று உச்ச நீதிமன்ற நீதியரசர் உத்திரவிட்டார். அதே போன்று இன்னும் சில நாட்கள் அல்லது மாதங்கள் அல்லது வருடங்கள் கழித்து, ஹெல்மெட் அணிந்து வழிப்பறி கொள்ளைகள், கொலைகள் அதிகம் நடைபெறுகின்றன என்று கூறி அதற்கும் தடை விதிக்கலாம். நமது நீதியரசர்கள் கற்றறிந்தவர்கள். காலத்திற்கேற்றவாறு நீதி வழங்குவதில் திறமையானவர்கள். இல்லாவிட்டால், கற்பழிப்பு வழக்கில் சமரசம் செய்து கொள்ளும்படி தீர்ப்பு வழங்கிவிட்டு பின்னர் அதனை திரும்ப பெற்றுக்கொள்வார்களா ? எனக்கே ஏற்பட்ட கசப்பான அனுபவம் என்னவென்றால், எனக்கு உரிமையான இல்லத்தினை, சில மோசடி நபர்கள், மோசடியாக விற்கிரயம் செய்ததனை நீதிமன்றத்தில்   வழக்கு தொடர்ந்தால், அந்த வழக்கு விசாரணைக்கு இன்னும் எடுக்கப்படாமல், 5 வருடங்களாக நிலுவையில் இருக்கையில், மோசடி நபர்களுடன் சமரசம் செய்து கொள்ளும்படி அழைப்பாணையினை சென்னை உயர் நீதிமன்றம் அனுப்பியுள்ளது. எங்கே போய் முட்டிக்கொள்வதென்று தெரியவில்லை.  

வாட்ஸ் அப்பில் வந்த குறுஞ்செய்தி :

டமிழ் நாட்டுல,
4042 நூலகங்கள் இருக்கு,6824 டாஸ்மாக் இருக்கு, நான் படிக்கவா?குடிக்கவா?

10 ஊருக்கு 1 பள்ளிக்கூடம்!
1 ஊருக்கு 10 டாஸ்மாக் கடையா?

காய்ச்சி விற்றால் கள்ள்சாராயம்!
அரசே விற்றால் நல்ல சாராயமா..!

இந்த வருஷம் இவ்வளவு பெட்ரோல் விக்கனும்னு தீர்மானம் போட்டால் அது அரபு நாடு.

இந்த வருஷம் இவ்வளவு வாகனங்கள் விக்கனும்னு தீர்மானம் போட்டால் அது ஜப்பான் நாடு.

இந்த வருஷம் இவ்வளவு சாராயம் விக்கனும்னு தீர்மானம் அது டமிழ் நாடு...

குடிச்சா அரசாங்கத்துக்கு வருமானம்..
போதைல வண்டி ஒட்டுனா போலீஸ்க்கு வருமானம்..
அடிபட்டா ஆஸ்ப்த்திரிக்கு வருமானம்..
குடிக்கிற உங்களுக்கு அவமானம் மட்டுமே..!

காலியான சாராய பாட்டில் சொல்கிறது..
இன்று உன்னால் நான் காலி
நாளை என்னால் நீ காலி...!

மது நாட்டுக்கு வீட்டுக்கு கேடு, புகைபிடித்தல் உடல்நலத்திற்கு கேடு என்று மக்களின் மீது அன்பை பொழியும் அரசு அவற்றை விற்கவும் செய்யும் அதை நீதிமன்றம் தட்டி கேட்காது.

குடிமக்கள் நன்கு குடித்துவிட்டு வண்டிகளை ஓட்டுவதாலும் வண்டிகளுக்கு குறுக்கே வந்து விழுவதாலும் விபத்துகள் நடக்கின்றன. குடித்தவர்களால் அவர்களுடன் வாழ்பவர்கள் படும் கஷ்டங்கள் சங்கடங்கள் சொல்லி மாளாது. இதை நீதிமன்றம் தட்டி கேட்காது.

ஹெல்மட் அணிவதால் மட்டுமே மக்கள் கஷ்டபடுவது போல் நீதிமன்றம் இதை மட்டும் கட்டாயப்படுத்தும்.

மக்கள் மீது அக்கறை காட்டும் நீதிமன்றமே உன்களால் டாஸ்க் மார்கை மூட ஆனையிட முடியுமா?

தேர்தல் ஆணையமும் பயமுறுத்தலும்

ஒரே வாக்காளரின் பெயர் இரண்டு இடங்களில் இருந்தால் குற்றவியல் நடவடிக்கை எடுக்கப்படும் என வாக்காளர் பட்டியல் பார்வையாளர் வீர சண்முகமணி கூறியதாக நாளிதழ் ஒன்றில் செய்தி வெளியாகியுள்ளது. நியாயமான எச்சரிக்கை தான்.

வாக்காளர் ஒருவர் தன் இருப்பிடத்தை நகரின் வேறு ஒரு பகுதிக்கோ அல்லது வேறு ஒரு நகரத்திற்கோ மாற்றிக்கொண்டு செல்கையில், புதியதாக குடி பெயர்ந்த இடத்தில் வாக்காளராக பதிவு செய்கையில் இத்தகைய தவறு நேர வாய்ப்புள்ளது. அதற்காக குற்றவியல் நடவடிக்கை என்பது சற்று மிகையாகவே படுகின்றது.

பெரும்பாலும் தேர்தல்கள், மாநிலம்  முழுவதும் ஒரே நாளில் நடத்தப்படுகின்றன. அவ்வாறு நடத்த முடியாதபட்சத்தில், இரண்டு அல்லது மூன்று நாட்கள் இடைவெளியில்  இரண்டு கட்டமாக நடத்தி முடிக்கப்படுகின்றன. தமிழ்நாட்டைப்பொறுத்தவரையில் அதிகபட்சமாக இரண்டு கட்டத்தை தாண்டுவதற்கு வாய்ப்பில்லை. மாநிலம் முழுவதும் ஒரே நாளில் தேர்தல் நடத்தும் பட்சத்தில், வாக்காளரின் பெயர் இரு வேறு தொகுதிகளில் பெயர் இருப்பினும், நிச்சயமாக இரு இடங்களிலும் வாக்களிப்பது என்பது சாத்தியமில்லை. அட, ஒரு தடவை வாக்களிக்கவே நம்மவர்களில் சிலர் சுணங்கிக்கொண்டு ஓட்டளிக்க வாக்குச்சாவடி பக்கமே செல்வதில்லை. இதில் இரண்டு தடவை எங்கிருந்து ஓட்டளிக்கப் போகின்றார்கள் ? பின் எதற்கு இந்த எச்சரிக்கை ? உங்கள் வாக்குரிமையை பயன்படுத்தி கள்ள ஓட்டினை தடுக்கத்தான். அதற்கு வாக்காளர்களை மட்டும் குற்றம் சாட்டுவது நியாயம் தானா ? தேர்தல் ஆணையத்தால் தடுக்க இயலாதா ? தற்போதைய கணிணி உலகில், ஒரு வாக்காளரின் இரண்டு அல்லது இரண்டிற்கு மேற்பட்ட பதிவுகளை கண்டறிய இயலாதா ? இரண்டாவதாக வாக்காளராக பதிவு செய்வதற்கு முன்பே, கணிணியின் துணையுடன் கண்டறியலாமே ! இதெல்லாம் அதிக பணிச்சுமை என்று கூறலாம். ஆனால் குற்றவியல் நடவடிக்கை பணிச்சுமையற்றதா ?

1986 -ம் வருடம் பெங்களூர் நகரில் வசித்து வருகையில் கடவுச்சீட்டிற்காக (பாஸ்போர்ட்) விண்ணப்பித்திருந்தேன், 1991 -ம் வருடம் அது பயன்படுத்தப்படாமலேயே காலாவதியாகிவிட திரும்பவும் 1995 -ம் வருடம் புதியதாக அதே பெங்களூர் நகர அலுவலகத்தில் விண்ணப்பித்தேன். புதியதாக விண்ணப்பிக்கையில் முன்பே பெறப்பட்ட கடவுச்சீட்டின் தகவல்களை தெரிவிக்க வேண்டுமென குறிப்பிடப்பட்டிருந்தும், பழைய கடவுச்சீட்டு கவனக்குறைவாக  எங்கோ வைத்துவிட்டு அது கிடைக்காமையினால் அந்த பகுதியினை நிரப்பாமல், புதியதாக தானே விண்ணப்பிக்கின்றோம், நிரப்பாவிட்டால் பரவாயில்லை என்று நினைத்து விண்ணப்பித்து விட்டேன். பாஸ்போர்ட் அலுவலகத்திலிருந்து எனக்கு ஓலை ஒன்று வந்தது. அதில், பழைய கடவுச்சீட்டு குறித்த விவரங்களை தெரிவிக்காமல் நீங்கள் மறைத்துள்ளீர்கள், சட்டப்படி இது குற்றமாகும், இதற்கு நீங்கள் நேரில் விளக்க மளிக்கவிட்டால் உங்கள் மீது குற்றவியல் நடவடிக்கை எடுக்கப்படும் என கடிதம் வந்தது. பின்னர் நான் நேரில் சென்று விளக்கமளித்ததும், அதனை ஏற்றுக்கொண்டு  புதிய கடவுச்சீட்டினை வழங்கினார்கள்.  எதற்கு இதனை சொல்கிறேனென்றால், இன்றைய கணிணி உலகில், கணிணியின் உதவியுடன் இரண்டாவது வாக்களர் அடையாள அட்டை வழங்குவதற்கு முன்பே எளிதாக கண்டறிவதை விடுத்து, இரண்டு, மூன்று என்று அள்ளி வழங்கிவிட்டு, பின்னர் வாக்காளர்களை மிரட்டுவதன் காரணம் புரியவில்லை.

இரு இடங்களில் பெயர் உள்ள வாக்காளர்களை மிரட்டுவது ஒரு புறம் இருக்கட்டும், ஒரே வேட்பாளர் இரு வேறு தொகுதிகளில்  போட்டியிடுவது முறைதானா ?  ஒரே நபர் இரு வேறு தொகுதிகளின் பிரதிநிதியாக செயல்பட இயலாது என நமது அரசியலமைப்பு சட்டம் சொல்கையில், இரு வேறு தொகுதிகளில்  போட்டியிடும் நபர் இரண்டு தொகுதிகளிலும் தேர்ந்தெடுக்கப்பட்டால், வேட்பாளர் துறக்கும் தொகுதியின் மறு தேர்தலுக்கு செலவு செய்வது யார் ? வேட்பாளரா செலவு செய்கிறார் ?  அரசாங்கம் தானே ! அது மக்களுடைய வரிப்பணம் தானே ? அதை நமது தேர்தல் ஆணையம் தடுக்க ஏன் முன்வரவில்லை ? தேர்தல் ஆணையம்  என்பது சுய அதிகாரம் பெற்ற அமைப்பு தானே ? இந்திய அரசுப்பணி அதிகாரிகள் அரசுக்கு ஆலோசனை சொல்லி தேவையான மாற்றம் கொண்டு வருவதற்காகத்தானே  ஐ.ஏ.எஸ் அதிகாரிகளை நியமிக்கின்றது ? செய்யவேண்டியவன இன்னும் பல இருக்கையில் வாக்காளர்களை மிரட்டும் அதிகாரிகளை என்னவென்று சொல்வது ?

வாக்காளர்களுக்கு விடப்பட்டிருக்கும் இன்னொரு மிரட்டல் என்னவென்றால், ஓட்டிற்கு பணம் வாங்கினால் 3 ஆண்டு சிறைவாசம் என்பது. பணம் கொடுப்பவருக்கு என்ன தண்டனை என்று கூறவில்லை. பணம் பெறுபவருக்கு என்ன தண்டனை என்று தான் எச்சரிக்கை. இதிலும் அரசியல்வா(வி)யாதிக்கு சாதகமாகவே தேர்தல் ஆணையம் உள்ளது. 'சன்' தொலைக்காட்சியில்  செய்திகளுக்கிடையே யார், என்ன ,எங்கே எப்போது, எப்படி என்கின்ற வினாவினை கேட்பார்கள். அதே போன்று ஓட்டிற்கு பணம் அளிக்கும் முறையினை அறிமுகப்படுத்தியது யார், எங்கே, எப்போது, எப்படி  என்று கேட்டால் அனைவருக்கும் அதன் விடை தெரியும். அதனால் தானோ என்னவோ அந்த கேள்வி கேட்கப்படவில்லை.